Finn Coren har i omlag åtte år halde på med eit omfattande prosjekt med å tonesette over 30 dikt og gjendiktingar av Olav H. Hauge. Med dette dobbeltalbumet går Coren djupare inn i samspelet mellom dikt og musikk. Han har valt dikt frå alle Hauges samlingar, samt frå to av hans gjendiktingar. Coren utforskar Hauges mange sider; det lyriske, det tunge og det lengtande. "I draumar fær du" er produsert av Finn Coren og Øystein Vesaas, og 15 musikarar frå både klassisk, jazz og rockemiljøet deltek på innspelinga. Utgjevinga inneheld eit omfattande teksthefte der dikta er trykt både i originalversjon og i engelsk omsetting av Robin Fulton. Heftet inneheld også fleire landskapsportrett samt portrett av Hauge, teken av Morten Krogvold og Asbjørn Jensen.
