Forlaget skriver om denne boka:
I november 1936 stod den ærgjerrige og lynande intelligente Ragnvald Skrede (1904-1983), førstelærar, klassiskfilolog med toppkarakterar i latin og gresk, klokkar, skulestyreformann og lokalpolitikar i barndomsbygda Vågå, for retten i ei av dei største utuktssakene i norsk rettshistorie, Heile 69 vitne var innkalla, Sverre Riisnæs , seinare kjend som NS-"minister" - stod for påtalen, og med fagleg rettleiing frå psykiatrisk sakkunnig Gabriel Langfeldt, dømde ein splitta jury Skrede til 3 års soning i Botsfengslet. Han fekk livsvarig forbod mot å praktisere som lærar og miste sine statsborgarlege rettar for 10 år.
Ragnvald Skrede fekk seinare ein lysande karriere i norsk litteratur, som ein av dei fremste kritikarane i etterkrigstida, frå 1945 i Verdens Gang, frå 1952 til 1967 i Dagbladet der han vart kollega med somme av dei som hadde skrive krassast om han og rettssaka. Han fekk på trykk innpå 2000 artiklar om litteratur, gav sjølv ut 12 diktsamlingar, var den første lyrikaren som fekk Kritikarprisen, var på 1970-talet formann i Det litterære råd og medlem av den norske juryen for Nordisk Råds Litteraturpris.
