Forlaget skriv om denne boka: Korleis forstår vi verda? Korleis kjem forståinga vår til uttrykk gjennom forteljingar, populærlitteratur og folkedikting? Kva har gammal og ny folkedikting felles?
Forfattarane gir ei innføring i oppleving og forteljing som pedagogisk metode. Dei vil vise at ved å bruke forteljinga bevisst, vil innlæringa av fagstoff bli lettare og meir morosam både for elevar og lærarar, og ikkje minst vil kvar og ein få ei betre forståing av samanhengane i ulike fag. For barn og ungdom er tradisjonell folkedikting vanskeleg tilgjengeleg i språk og innhald. Forfattarane viser korleis all folkedikting er skapt og stadig blir skapt i urgamle mønster. Boka gir såleis omgrep til å forstå dei arketypiske grunnforteljingane i populære filmar som Harry Potter, Ringenes Herre og Star Wars, i teikneseriar, dataspel og liknande. Ei bru blir bygd frå tradisjonelle segner, mytar, eventyr, folkeviser og balladar til ufo-historier, vitsar og gåter. Det skal få elevane til å forstå at dei er prega av den kulturen dei veks opp med, og at røtene til samtidskulturen går langt tilbake.
