Hilde Myklebust er forfattar og bonde. I «Kvar ein fugl» står staden, familien og naturen sentralt. Dikta er konkrete, biletprega og teiknar liner mellom slekta som kom forut, garden som bind saman historier over tid og naturen som syter for nytt liv frå ledd til ledd. Stadnamn, pløya mark, riss i tre og opptrakka spor synar lenkjene til fortida og skapar ein bakgrunn for mora og den nye dottera som fødast inn i rekkja av gardsfolk. Omtalen er utarbeidd av BS.
Dikt med djupe røter. Frå ein gard i ein fjelldal spring dikta ut. Dei dreier rundt det å drive ein slektsgard vidare og å bli mor til barn som er ein ny generasjon i ei lekkje som strekkjer seg langt attende i tid. I eit konkret og biletsterkt språk fortel dei om garden som ein stad som ser liv komme og gå. Dei som har levd før, er alltid til stades. I steingardar og bygningar, landskap og marker, i namn og spor, gamle tre og i fuglane som flyg over tunet. Nærleiken til naturen er sterk og tydeleg, og slik blir også det forgjengelege eit bakteppe for alt som hender.
