HISTORIA OM KOR VI ALLE KJEM FRÅ
SØSKENA PÅ KLEIVA I NAUSTDAL har levd heile livet saman. Magnar Kleiva hugsar då Oddny var nyfødd og vart legd på kjøkenbordet i eit ullteppe. No er søskena gamle, men driv framleis garden slik dei alltid har gjort. Dei lever eit enkelt liv, tett på dyra og naturen.
Å kome til Kleiva er som å stille klokka 50 år tilbake. To millionar nordmenn har sett filmane og TV-programma om Oddny og Magnar, og blitt glade i dei to. Journalist Ivar Myklebust Longvastøl tek oss med tilbake til småbruket.
Ein gong var dei seks i familien. Ei av søstrene var fødd utanfor ekteskap, ei anna var utviklingshemma. Det var harde kår på den gamle husmannsplassen. Ingen av søskena gifta seg eller fekk born. No er berre Oddny og Magnar igjen, men ein ny familie har flytta inn på garden. Dette er ei forteljing om to annleis, men rike og gode liv.
