Forlaget skriver om denne boka:
"Huset står på ei øy. Før trudde eg alle budde slik, med sjø rundt seg.
Når ein skulle noko, måtte ein over sjøen. Og skulle ein langt, måtte ein over
ein sjø til. Og endå ein om ein skulle lenger. Til slutt ville ein komme attende til
sin eigen sjø. Til denne sjøen, og til slutt heilt på land, til øya. Hit.
Når vi skulle noko, måtte vi ta båt, eller ei ferje som åt bilane ein etter ein og
spydde dei ut på den andre sida. Når nokon brekte foten, når ei av dei gamle
damene hadde tarmslyng, eller når mødrene skulle ha babyar, måtte dei over
dit - over sjøen. Eller når ein hadde dårleg rygg og skulle til undersøking på
sjukehuset. Vi måtte over den blå, grå og somme tider svarte sjøen."
Det er snart jul.
Ei ung kvinne har reist attende til huset der ho vaks opp. Her ventar ho på
syster si som snart skal komme. Dei skal feira jul i lag. Medan ho ventar fyllest
huset av andre stemmer og andre tider.
