Forlaget skriver om denne boka:
"I vanlege år kjem det 1300 millimeter regn. Det piskar mot glasrutene, plaskar mot svaberga, høljar over sydvesten og ausar over vindusviskaren. Det småyrar vårleg, det sildrar sommarmildt og det fell med tunge dropar i haustleg austavind. Jorda tar unna det meste og gjer det om til grøde og grøne fargar."
Slik blir det sørvestlandske regnet skildra i denne boka. Ho handlar om eit frodig kystlandskap og det som lever og veks der, bær, grønsaker, neter, fisk, fuglar og dyr. Fotograf og forfattar vandrar rundt i landskapet og ser og sansar på kvar sin måte, nyt og minnest, fantaserer og fabulerer.
Lesaren blir invitert med inn i skildringane og heim på kjøkkenet der råvarer frå sjø og land blir til tradisjonsrike, velsmakande og gjestefine rettar. Boka fortel dessutan om korleis kystlandbruket og kulturlandskapet på ei øy i kyst-Norge har utvikla seg. Fotografen skildrar kultur og landskap i personlege uttrykk som som fylgjer teksten sin tone. Me får presise glimt av det sørvestnorske øyalynnet og innsikt i tenkjemåtar, arbeid, skikkar og levevis i ord og bilete.
Det er ei raus og glad bok. Ho sluttar med eit måltid av nyfiska sei.
