Forlaget skriver om denne boka:
Dette er ei bok med leiting etter det marginale, det som er «på grensa» - der det umedvitne smyg seg inn i det medvitne, der den menneskelege grunnsituasjonen glimtvis kjem til syne, og der moderniteten avslører seg sjølv. I tråd med Apelog Habermas ser forfattaren det moderne som «eit ufullenda prosjekt».
Ein del eksistensielle og religionsfilosofiske emne dukkar opp i teksten på ein måte som ikkje er så vanleg i samfunnsfilosofiske modernitetsanalysar. Skrekkvisjonen er ein helsevitskap som - ut frå den sosialhygieniske tenkjemåten - har «teke over» desse emna.
Det kjem dessutan kommentarar til ei rad kjende tenkjarar: Adorno, Aristoteles, Camus, Derrida, Habermas, Heidegger, Jaspers, Løgstrup, Marquard, Weber, Wittgenstein, Zapffe m.fl. Boka utgjer eit «grensetilfelle» med omsyn til retoriske sjangrar. Ho har innslag av fleire.
Jon Hellesnes er forfattar og filosof. I tillegg til ei rad filosofibøker har han gitt ut eit par romanar. I dei seinare åra har han skrive og publisert ein del på tysk, og han har nærkontakt med kollegaer i Tyskland.
